PARIS — Sinabi ni French Prime Minister Elisabeth Borne noong Linggo na ang mga disposable vapes ay malapit nang ipagbawal sa bansa bilang bahagi ng isang pambansang plano laban sa paninigarilyo.
Hindi sinabi ni Borne kung kailan papasok sa bisa ang pagbabawal habang nagsasalita siya sa radyo ng RTL.
Sinabi niya na malapit nang ihayag ng gobyerno ang bagong plano nito upang labanan ang paninigarilyo, na aniya ay sanhi ng 75,000 kamatayan kada taon sa bansa.
Kasama rito ang isang pagbabawal sa mga disposable vapes, na sinabi niyang “nagbibigay ng masamang gawi sa mga kabataan.”
“Ito ay isang reflex at galaw na nakasanayan ng mga kabataan. Ganito sila nagsisimulang manigarilyo,” dagdag pa niya.
Karamihan sa mga disposable e-cigarettes, na itinatapon pagkatapos gamitin, ay may matatamis at prutas na lasa tulad ng pink lemonade, gummy bear at watermelon na nakakaakit sa mga teenager. Ibinebenta sila sa France karaniwan sa halagang 8 euros (US$8.7) hanggang 12 euros (US$13).
Ang umiiral nang pagbabawal sa pagbebenta ng mga electronic cigarette device sa mga menor de edad ay hindi lubos na sinusunod. Ang pagtataguyod o pag-aadvertise ng mga produktong ito ay ipinagbabawal din.
